Kanë përfunduar sot kërkimet për 30-vjeçarin Jurgen Karaj, trupi i pajetë i të cilit u gjet në rrjedhën e përroit në fshatin Darsë të Klosit. I riu ishte shpallur i zhdukur prej disa javësh, pasi automjeti me të cilin udhëtonte ra në përrua pas një aksidenti.
Në operacionin e kërkimit u përfshinë forca të shumta, mes tyre ushtria, efektivët e forcave “Shqiponja”, zjarrfikësit e Matit dhe Klosit, punonjës të Bashkisë Klos, banorë të zonës dhe familjarë të viktimës. Po ashtu, kërkimeve iu bashkua edhe një ekip i specializuar nga Kosova për operacione nënujore, me urdhër të presidentes Vjosa Osmani.
Sipas policisë, Jurgen Karaj ndodhej si pasagjer në mjetin që drejtohej nga 24-vjeçari Andi Losha. Ky i fundit humbi kontrollin e automjetit, i cili përfundoi në përrua. Drejtuesi i mjetit arriti të dilte nga uji, por u largua nga vendngjarja pa njoftuar autoritetet dhe pa i dhënë ndihmë mikut të tij.
Pas kapjes së tij, Andi Losha iu nënshtrua testit të alkoolit, i cili rezultoi pozitiv. Ai akuzohet për largim nga vendi i aksidentit dhe mosdhënie ndihme, ndërsa hetimet vijojnë për zbardhjen e plotë të rrethanave të ngjarjes.
Trupi i 30-vjeçarit u gjet sot, duke i dhënë fund kërkimeve dhe duke konfirmuar tragjikisht përfundimin e tij fatal.