Garda Civile spanjolle ka njoftuar arrestimin në Shqipëri të personit të dyshuar si autor i të shtënave me armë zjarri të ndodhura më 21 qershor 2024 në Ibiza, një ngjarje që, sipas hetuesve, lidhet me përplasjet mes grupeve të trafikut të drogës.
Sipas autoriteteve spanjolle, i arrestuari akuzohet për tentativë vrasjeje, pasi dyshohet se ka qëlluar disa herë ndaj një personi, i cili mbeti i plagosur rëndë.
Hetimi nisi pasi një automjet la një të plagosur në hyrje të Spitalit Can Misses dhe u largua menjëherë nga vendi i ngjarjes. Viktima kishte marrë dy plagë me armë zjarri dhe, për shkak të gjendjes së rëndë, u transportua me urgjencë në Spitalin Universitar Son Espases në Majorka për trajtim kirurgjikal.
Fillimisht, drejtuesi i automjetit deklaroi se ai dhe i plagosuri kishin shkuar në një zonë të Sant Josep për të kryer një vjedhje në një banesë dhe se ishin qëlluar nga një person i armatosur. Megjithatë, hetimet e Gardës Civile e hodhën poshtë këtë version.
Sipas autoriteteve, të plagosuri dhe shoqëruesi i tij synonin të grabisnin një ngarkesë droge nga një grup tjetër trafikantësh, në atë që njihet si “vuelco de droga”. Hetuesit pretendojnë se autori i të shtënave ishte pjesëtar i organizatës kriminale shqiptare që ruante pronën ku ndodhi ngjarja.
Pas incidentit, i dyshuari u largua nga Ibiza dhe u vendos në Shqipëri. Në kuadër të Operacionit “Vlad Ib”, autoritetet spanjolle bashkëpunuan me Policinë e Shtetit shqiptar për lokalizimin e tij.
Më 9 qershor, Policia shqiptare njoftoi arrestimin e të dyshuarit, i cili aktualisht ndodhet në pritje të ekstradimit drejt Spanjës, ku do të përballet me drejtësinë në bazë të Urdhrit Ndërkombëtar të Arrestimit.
Garda Civile vlerësoi bashkëpunimin mes autoriteteve spanjolle dhe shqiptare, duke theksuar se hetimi, i cili zgjati rreth dy vite, bëri të mundur zbardhjen e ngjarjes dhe identifikimin e autorit të dyshuar.