Përmbytjet e shkaktuara nga reshjet e dendura të shiut që kanë vazhduar për disa ditë radhazi, kanë prekur seriozisht territorin e Lushnjës dhe Divjakës. Lumi Seman ka dalë nga shtrati, duke përmbytur rreth 130 hektarë tokë bujqësore në fshatrat Ngurrëz dhe Imshtë, duke shkaktuar dëme të konsiderueshme. Ndërkohë, lumi Shkumbin është shumë pranë daljes nga shtrati, duke përmbytur disa hektarë tokë të tjera.
Sipas burimeve lokale, rreth 150 hektarë tokë bujqësore në njësinë administrative Grabjan të Divjakës dhe në njësinë administrative Dushk të Lushnjës janë përmbytur nga uji. Përballë kësaj situate, hidrovori i Tërbufit, ai i Karavastasë dhe hidrovori i Divjakës janë duke punuar me kapacitet të plotë për të mbajtur situatën nën kontroll, por reshjet vazhdojnë ende me intensitet mesatar.
Autoritetet vendore dhe shërbimet emergjente janë në gatishmëri për të përballuar situatën dhe për të minimizuar dëmet që mund të shkaktohen nga përmbytjet.