Erioni dhe Flora janë dy “shqiptarë” më të fundit që janë bërë protagonistë në mediat britanike.

Por këtë herë nuk bëhet fjalë për emigrantë shqiptarë, por për një luan dhe një ari që mbaheshin si kafshë shtëpiake në një vilë në Tiranë. Sipas “Daily Mail”, luani 3-vjeçar dhe arusha 2-vjeçare mbaheshin në kafaz, në kushte shumë të këqija. Ata u zbuluan nga policia, pas disa videove të publikuara nga personi që i mbante në rrjetin social “Tik Tok”.

Një ekip nga organizata “Katër Putrat” ndërhyri për t’i liruar, duke i dërguar në një strehë për kafshë të egra në Gjermani. Të dyja kafshët ishin në gjendje të keqe dhe kanë nevojë për kujdes.  

“Një kontroll fillestar vizual përcaktoi se Flora është e kequshqyer dhe ka probleme me dhëmbët, kështu që plani i saj i rimëkëmbjes është tashmë në proces. Ndërsa tek Erioni u vu re se krifa e tij kishte rënë plotësisht, për arsye që veterinerët ende nuk kanë qenë në gjendje t’i përcaktojnë”, tha Magdalena Scherk-Trettin, një menaxhere e lartë projekti përgjegjëse për shpëtimin në organizatën ndërkombëtare për mirëqenien e kafshëve “Katër Putrat”.

Tregtia e paligjshme e kafshëve të egra mbetet një problem sistemik në Shqipëri dhe në të gjithë rajonin, ku arinjtë në veçanti, si dhe kafshët ekzotike, mbahen në kafaze në restorante ose në prona private me pak ose aspak kujdes nga ekspertët.

Origjina e Erionit dhe Florës mbetet e paqartë. “Katër Putrat”  tha se beson që luani është viktimë e trafikimit të paligjshëm të kafshëve të egra, ndërsa ariu ka të ngjarë të jetë kapur nga pyjet e zonës.

“Shpëtimi nxjerr në pah nevojën urgjente të Shqipërisë për të luftuar tregtinë e paligjshme të kafshëve të egra dhe mbajtjen private të tyre”, tha organizata në një deklaratë.

Legjislacioni i dobët, boshllëqet ligjore dhe zbatimi i dobët i ligjit kanë kontribuar në robërinë private dhe tregtinë e përhapur të kafshëve të egra në Shqipëri, sipas “Katër Putrat”, i cili vlerëson se më shumë se 60 mace të mëdha ende mbahen në kushte të këqija në Shqipëri.

Ligji shqiptar u lejon individëve ose organizatave të mbajnë ekzemplarë të kafshëve të egra nëse ato kanë lindur në robëri, për shembull në një kopsht zoologjik ose në një strukturë të specializuar. Speciet jo-vendase të lindura jashtë Shqipërisë gjithashtu mund të mbahen nëse mund të sigurohen dokumente që vërtetojnë se ato janë fituar nga qendra të specializuara të mbarështimit dhe tregtisë.