Kryetari i Partisë së Lirisë, Ilir Meta, i ka kërkuar Prokurorisë së Posaçme të pyetet për ngjarjen e 21 janarit 2011, duke pretenduar se ka prova që mund të ndihmojnë në zbardhjen e asaj ngjarjeje të rëndësishme. Kjo kërkesë ka shkaktuar reagime edhe nga lideri i opozitës, Sali Berisha, i cili nuk e përjashton mundësinë që Meta, ish-zëvendëskryeministër në atë kohë, të ketë informacione relevante për ngjarjen, për shkak të pozicionit të tij politik.
Berisha ka kujtuar një bisedë që ka pasur me Ilir Metën në ditët para 21 janarit, kur Meta i kishte thënë se do të dorëhiqej nga posti i zv.kryeministrit, duke shpjeguar se nuk do të shkonte asnjëherë në Prokurori si zyrtar i lartë. “Ilir Meta më ka thënë se unë do jap dorëheqjen sepse unë në prokurori nuk shkoj si zëvendëskryeministër,” tha Berisha, duke sugjeruar se Meta mund të kishte dijeni për diçka që lidhej me atë ngjarje të rëndësishme.
Në këtë kuadër, Berisha gjithashtu ka përmendur një bisedë që kishte pasur me Dritan Priftin, një tjetër figurë politike të asaj kohe, ku kishte kërkuar që të publikohej një regjistrim që lidhej me bisedat e Priftit dhe Metës. Sipas Berishës, kjo bisedë kishte ndodhur përpara daljes në publik të videos së përgjimit mes Priftit dhe Metës, që tronditi skenën politike.
“Sali Berisha kryeministër, së pari kishte dëgjuar Dritan Priftin, ose i ishte kërkuar nga Dritan Prifti ta emëronte në një detyrë tjetër të rëndësishme ose përndryshe ka një regjistrim.
Fjala ime ishte kjo: nxirre sapo të dalësh nga dera e zyrës time. Nxirre.
Kjo është e vërteta. Kurrë, kurrë nuk më merr dot kush mua peng”, thotë Berisha.