Një ngjarje tragjike ka ndodhur në kalanë e Beratit, ku 52-vjeçari Keli Hoxha humbi jetën pas një konflikti me 63-vjeçarin Kristo Mema. Sipas informacioneve nga Policia, autor i krimit është Mema, i cili ka qëlluar për vdekje Kelin pas një debati të shkaktuar nga prekje e kalit të tij.
Dëshmitarët dhe policia kanë raportuar se pas një paralajmërimi të autorit, “Mos e prek kalin se është i acaruar sot”, Keli nuk është bindur dhe ka prekur kalin. Më pas, për shkak të një sharjeje nga ana e viktimës, konflikti ka eskaluar dhe Kristo Mema ka nxjerrë thikën e fshehur në samarin e kalit dhe ka goditur Kelin në trup, duke e vrarë.
Pas krimit, Mema është larguar nga vendngjarja dhe është fshehur në një shpellë të kalasë, ku ka qëndruar për disa orë duke tentuar të shmangte arrestimin. Ai ka lidhur kalin në kasollen e tij dhe ka marrë ushqime për t’u mbajtur gjatë periudhës që policia po e kërkonte.
Megjithatë, një version tjetër të ngjarjes kanë dhënë familjarët e viktimës, të cilët janë shprehur se konflikti ka nisur vetëm kur Keli ka prekur kalin me dorë, siç e paralajmëroi edhe autori. Ata kanë theksuar se Keli nuk ka sharë dhe ofenduar Kriston, dhe se pas paralajmërimit të tij, ai ka thënë “s’ka asgjë të keqe”. Sipas familjarëve, ngjarja ka përfunduar në një vrasje të papritur dhe të pabazuar, duke pasur parasysh se nuk kishte pasur asnjë shkak të dukshëm për një reagim kaq të dhunshëm.