Ambasadori i Shqipërisë pranë Bashkimit Evropian, Feri Hoxha, ka deklaruar se Shqipëria gëzon sot reputacionin më të mirë në historinë e saj në arenën ndërkombëtare.

Në një postim në rrjetet sociale, Hoxha shprehet se pas afro katër muajsh në detyrë dhe takimeve me homologë, diplomatë, zyrtarë e ekspertë nga vendet e BE-së dhe më gjerë, ka arritur në përfundimin se vendi ynë ka fituar më shumë respekt, besueshmëri dhe mbështetje se kurrë më parë.

Sipas tij, Shqipëria shihet sot si një partner serioz dhe i besueshëm, ndërsa emri i saj lidhet gjithnjë e më shumë me zhvillimin, turizmin, mikpritjen dhe transformimin e vendit.

Hoxha thekson se Shqipëria ndodhet pranë realizimit të objektivit strategjik të anëtarësimit në Bashkimin Evropian, duke e cilësuar këtë një mundësi historike që kërkon angazhimin dhe kontributin e të gjithë shqiptarëve, përtej bindjeve politike.

Postimi i Ferit Hoxhës

Një përfundim që nuk le vend për mëdyshje.

Pas afër katër muajsh në detyrë, kohë gjatë të cilës kam takuar dhe biseduar me të gjithë homologët e mi në vendet anëtare të Bashkimit Evropian, në rajon dhe në mbarë hapësirën evropiane; pasi kam zhvilluar qindra takime me zyrtarë, diplomatë, gazetarë, ekspertë dhe studiues që ndjekin e analizojnë zhvillimet gjeopolitike; dhe pasi kam marrë pjesë në dhjetëra ministeriale, konferenca, forume, takime e aktivitete ndërkombëtare, një përfundim del qartë:

Kurrë më parë në historinë e saj, Shqipëria nuk ka pasur një emër më të mirë në botë dhe një zë më të fortë në arenën ndërkombëtare.

Asnjëherë më parë, Shqipëria nuk ka gëzuar marrëdhënie të tilla miqësie e bashkëpunimi, të besueshme dhe të konsoliduara me partnerët dhe aleatët e saj, si në planin dypalësh, ashtu edhe në atë shumëpalësh.

Në asnjë moment të historisë sonë, Shqipëria nuk ka qenë më e respektuar, më e vlerësuar, më e dëshiruar dhe më e vizituar se sa është sot, me derën të hapur kudo dhe e mirëpritur gjithkund.

Në çdo kryeqytet ku kam qenë gjatë kësaj kohe, kam ndjerë të njëjtën frymë dhe kam përjetuar të njëjtën gjë: Shqipëria dëgjohet me më shumë vëmendje, trajtohet me më shumë respekt dhe, mbi të gjitha, shihet si një partner serioz, i besueshëm dhe me kontribut konkret e me potencial për të ofruar më shumë, edhe për Evropën edhe për rajonin.

Jo më pak domethënës dhe kuptimplotë është edhe ndryshimi i perceptimit.

Sot, emri #Shqipëri lidhet gjithnjë e më shumë me lirinë, suksesin, zhvillimin, turizmin, mikpritjen, energjinë pozitive dhe një shoqëri dinamike në transformim të pandalshëm, pasqyrimi i një realiteti tërësisht të transformuar: i një Shqipërie më të hapur, më konkurruese dhe më të pranishme se kurrë më parë në hartën politike, ekonomike dhe turistike të Evropës.

Dhe, mbi të gjitha, Shqipëria është në prag të realizimit të ëndrrës që bashkon shqiptarët kudo ku jetojnë, në çdo cep të vendit dhe në çdo anë të globit: anëtarësimit në Bashkimin Evropian dhe rikthimit të plotë në përkatësinë tonë historike, politike dhe qytetëruese evropiane.

Ky nuk është thjesht një moment historik.

Është një mundësi që vjen një herë në breza. Një dritare unike për të përmbushur aspiratën më të madhe kombëtare dhe për ta rikthyer Shqipërinë aty ku ka qenë gjithmonë vendi i saj i natyrshëm.

Por një mundësi e tillë nuk realizohet vetvetiu.

Ajo kërkon edhe më shumë përkushtim, edhe më shumë përgjegjësi, edhe më shumë punë, energji dhe vendosmëri.

Mbi të gjitha, kërkon kontributin e secilit prej nesh, përtej dallimeve politike, bindjeve apo vendit ku jetojmë.

Sepse anëtarësimi në Bashkimin Evropian është projekti ynë kombëtar.

Dhe pikërisht si i tillë, ai kërkon bashkimin e energjive tona më të mira, në mënyrë që këtë moment historik ta shndërrojmë në arritjen më të madhe të Shqipërisë demokratike dhe në një trashëgimi të qëndrueshme për brezat që do të vijnë.

Vetëm një dekikë mjafton për të hedhur vështrimin pas dhe për të kuptuar se ku ishim dhe ku gjendemi sot;

nga kemi ardhur dhe ku po shkojmë;

çfarë trashëguam dhe çfarë duam të ndërtojmë.

Të gjithë së bashku.