Policia Rrugore e Durrësit ka intensifikuar kontrollet në të gjitha akset rrugore të qarkut, duke përdorur dronë, radarë dhe makina inteligjente, me qëllim parandalimin e aksidenteve dhe menaxhimin e trafikut.
Si rezultat i monitorimeve të kryera gjatë një jave, 20 drejtues mjetesh janë arrestuar, pasi dyshohet se kanë kryer veprat penale “Drejtimi i mjeteve në mënyrë të parregullt” dhe “Shkelja e rregullave të qarkullimit rrugor”.
Ndërkohë, gjatë kësaj periudhe janë vendosur 5422 masa administrative për shkelje të ndryshme të Kodit Rrugor.
Sipas Policisë, masat janë ndarë si më poshtë:
- 83 për parakalime të gabuara;
- 3513 për tejkalim të shpejtësisë së lejuar;
- 1458 për ndalim ose qëndrim të gabuar;
- 82 për përdorim të celularit gjatë drejtimit të mjetit;
- 88 për drejtim të mjetit në gjendje të dehur;
- 198 për mosvendosjen e rripit të sigurimit.
Policia Rrugore njofton se kontrollet në rrugët e qarkut të Durrësit do të vijojnë, me fokus evidentimin dhe ndëshkimin e shkeljeve që rrezikojnë sigurinë e përdoruesve të rrugës.