Një sulm terrorist është shmangur në Greqi pasi policia ka arrestuar dy shtetas pakistanezë.
27-vjeçari Hayder, i cili jetonte në Zakynthos dhe 29-vjeçari Husein së bashku me tre persona të tjerë përbënin celulën terroriste të Greqisë që merrte urdhra nga një bashkatdhetar i cili jetonte në Teheran.
Hayder dhe Husein janë dy të arrestuarit që po planifikonin të sulmonin sinagogën izraelite në Psirri. Në mediat greke thuhet se këta shtetas kishin krijuar marrëdhënie me kriminelë nëpër burgje, me bashkatdhetarë dhe me shqiptarë për sigurimin e armëve dhe vrasësve profesionistë.
Para se të niseshin për të kryer sulmin, pakistanezët kishin diskutuar me njëri-tjetrin për numrin e personave që do vrisnin. Problemi i madh me të cilin u përballën ishte gjetja e njerëzve të besuar në fushën kriminale për t’i dorëzuar armët tek ata pasi ata ishin nën presion nga lideri i tyre në Teheran për të vepruar shpejt dhe për të mos humbur kohë. Ata do paguheshin me nga 15 mijë euro për çdo viktimë, prandaj synonin të vrisnin sa më shumë persona që të ishte e mundur.