Babai i njërës prej dy vajzave të mitura që humbën jetën tragjikisht në plazhin e Tales ka folur për herë të parë pas ngjarjes që tronditi opinionin publik.
Mes dhimbjes së thellë për humbjen e së bijës, ai ka kujtuar momentet e fundit para tragjedisë, duke treguar se vajza kishte insistuar vazhdimisht që atë ditë të shkonte në plazh me të afërmit.
“Mu lut shumë për të shkuar. Nuk e kisha lejuar më parë të shkonte në det, ishte hera e parë”, ka rrëfyer ai.
Babai tregoi gjithashtu se në kohën kur ndodhi ngjarja ndodhej në Durrës dhe se fillimisht nuk ishte informuar për përmasat e tragjedisë.
“Kur ndodhi ngjarja isha në Durrës. Më thanë vetëm se vajzat nuk ishin në gjendje të mirë. Më pas mësova se kishin hyrë në det pa i treguar askujt. Tezja e njërës prej tyre ishte aty, ndërsa kunata ime ndodhej me bashkëshortin”, u shpreh ai.
Ngjarja e rëndë ndodhi më 19 qershor në plazhin e Tales, ku dy kushërirat, Jonida Dajlani, 9 vjeçe, dhe Adelajda Misha, 11 vjeçe, humbën jetën pasi hynë në det për t’u larë. Sipas dëshmive të familjarëve, ato kishin hyrë në ujë pa dijeninë e të rriturve, ndërsa kushtet e vështira në det dhe dallgët e forta ua pamundësuan kthimin në breg.