Prokuroria e Posaçme Kundër Korrupsionit dhe Krimit të Organizuar, ka publikuar këtë të martë njoftimin zyrtar në lidhje me mega-operacionin e ndërmarrë në Elbasan, ku u godit një organizatë kriminale që merrej me trafikun e lëndëve narkotike nga Amerika Latina.

Rrjeti kriminal kishte bazën në qytetin e Elbasanit e shtrihte aktivitetin e tij në vendet e Bashkimit Europian dhe Amerikën Latine. Sipas SPAK kjo organizatë kriminale drejtohej nga Suel Çela, i shpallur në kërkim nga organet ligjzbatuese.

Ky operacion ka zbardhur gjithashtu disa ngjarje të rënda përfshirë atentatin ndaj Ardian Çapjas në vitin 2020, vrasjen e Bledar Muçës në Belgjikë dhe atentatin ndaj Elton Kilës i njohur ndryshe “Oti i Elbasanit”.

Tentativa për vrasjen e Adian Çapjas

Një nga ngjarjet e zbardhura nga SPAK është atentati ndaj Ardian Çapjas, i cili u qëllua me snajper në banesën e tij në Krastë të Elbasanit më 8 qershor 2020. Çapja mori një plumb poshtë supit, ndërsa pas ngjarjes ai u dërgua me urgjencë në spitalin e Traumës dhe iu nënshtrua një operacioni. Ky atentat ishte i treti ndaj Çapjas, pas dy atentateve të mëparshme në vitet 2016 dhe 2017. Hetimet e SPAK konfirmojnë se atentati ndaj tij u krye me urdhër të Suel Çelës, dhe se snajperisti Prekë Kodra është personi i dyshuar që kreu qitjen. Kodra rezulton një person i shpallur në kërkim për operacionin “Metamorfoza”.

Tentativa për vrasjen e Elton Kilës

Gjithashtu, organizata kriminale që drejtohej nga Suel Çela ka qenë e përfshirë në disa tentativa për të eliminuar rivalët e saj, përfshirë dhe atentatin ndaj Elton Kilës, i njohur ndryshe si “Oti i Elbasanit”. Ky atentat, i realizuar me urdhër nga Çela, ka mbetur në tentativë. Hetimet e SPAK zbuluan se emri i Kilës është përmendur edhe nga i penduari i drejtësisë Henrik Hoxhaj, i cili ka dëshmuar se Nuredin Dumani kishte premtuar 70,000 euro për eliminimin e tij.

Vrasja e Bledar Muçës

Organizata e drejtuar nga Suel Çela dyshohet se qëndron edhe pas atentatit vdekjeprurës ndaj krahut të djathtë të grupit “Çapja” në Elbasan, i cilësuar edhe si killeri i tyre, Bledar Muça.

SPAK akuzon organizatën kriminale të Suel Çelës se fshihet pas vrasjes së Bledar Muçës ndodhur në janar të 2022 në Belgjikë. Në njoftimin e SPAK thuhet se ky grup  “Siguroi kushtet dhe mjetet materiale për të kryer vrasje në dëm të E. K. dhe Bledar Muça.

Vrasja e tij u bë në Belgjikë më 22 Janar të vitit 2022, teksa edhe më parë i kishte shpëtuar dy atentateve të tjera, njëri prej të cilëve në Elbasan. Muça cilësohej si njeriu më i afërt i numrit dy të organizatës, Florenc Çapja, që fshihet në Dubai. Për këtë vrasje SPAKa ka lëshuar urdhërarrest ‘arrest me burg’ edhe për Sergei Hasanpapaj, i arrestuar në Belgjikë. Po për të njëjtë ngjarje, në tetor të këtij viti u arrestua Marsel D. 43-vjeçari u arrestua në aeroportin e Valencias. Mediat belge ishin ato që zbuluan se bëhet fjalë për shqiptarin Marsel D., i kërkuar për vrasje në Belgjikë, më 22 janar 2022 në Aartselaar. Ai ndihmoi ekzekutorët duke u treguar lëvizjet e Muçës.