Emri i Qazim Brukës rikthehet sërish në vëmendjen e opinionit publik, me një tjetër kapitull të një historie të mbushur me konflikte dhe përplasje familjare.
Vite më parë, ai u bë protagonist në emisionin “Me Zemër të Hapur”, ku rrëfeu një episod të rëndë nga jeta e tij. Gjatë një konflikti të ashpër familjar, Bruka u plagos me sëpatë nga ish-bashkëshortja, ndërsa më pas e plagosi rëndë edhe ai atë. Ngjarja përfundoi në dyert e drejtësisë: Bruka u dënua me burg, çifti u divorcua dhe fëmijët mbetën në kujdestarinë e nënës.
Por drama nuk përfundoi aty.
Në vitin 2017, ai tronditi sërish kryeqytetin kur u ngjit mbi një oxhak në zonën e Laprakës, në Tiranë, duke kërcënuar se do të hidhej nga një lartësi prej mbi 50 metrash. Për më shumë se një orë, forcat e policisë, RENEA, zjarrfikësit dhe familjarët negociuan për ta bindur të zbriste. Sipas asaj që u mësua në atë kohë, shkaku i aktit ekstrem ishte një konflikt i thellë familjar dhe pamundësia për të takuar fëmijët, për shkak të një urdhri mbrojtjeje të marrë nga ish-bashkëshortja.
Sot, Qazim Bruka rikthehet sërish në studio për të rrëfyer një tjetër përplasje. Ai pretendon se është përfshirë në një konflikt të fortë me familjarët e bashkëshortes aktuale, për shkak të një shume parash. Sipas tij, situata ka agravuar ndjeshëm marrëdhëniet dhe e ka vendosur në një gjendje të rënduar psikologjike.
Një histori që duket se nuk gjen paqe – me episode të përsëritura tensioni, akuza dhe konflikte familjare, që prej vitesh mbajnë emrin e tij në qendër të vëmendjes. Rrëfimi i radhës pritet të hedhë dritë mbi një tjetër kthesë të kësaj sage personale.