Policia ka zbardhur dinamikën e vrasjes në Sarandë, ku sot në mbrëmje rreth orës 21:30 u ekzekutua me armë zjarri shtetasi Rexhep Ismaili, pronar i një karburanti dhe kryetar i shoqatës “Çamëria” dega Sarandë.
Krimi erdhi pas një konflikti për motive të dobta që nisi në lokalin e karburantit në pronësi të viktimës në zonën e njohur si “Qafë Gjashtë”.
Sherri ka nisur me sende të forta, dhe më pas shtetasi Lulëzim Tabaku dyshohet se ka vrarë me armë zjarri 66-vjeçarin Ismaili.
Dyshohet se gjatë konfliktit me armë zjarri është plagosur edhe një person tjetër, i cili nuk është identifikuar ende pasi nuk është paraqitur për ndihmë mjekësore në spital.
Ndërkaq autori i krimit është larguar nga vendi i ngjarjes së bashku me personat e tjerë të përfshirë dhe të plagosurin.
Nga sherri në lokal te vrasja e Rexhep Ismailit, zbardhet dinamika e krimit
“Rreth orës 21:30, në vendin e quajtur “Qafë Gjashtë”, në lokalin në pronësi të shtetasit R. I., gjatë një konflikti për motive që do të zbardhen gjatë hetimit, mes disa personash, ku fillimisht konflikti ka nisur me sende të forta dhe më pas me përdorimin e armëve të zjarrit, ka mbetur i vrarë shtetasi R. I., 66 vjeç, banues në Qafë Gjashtë, Sarandë. Gjithashtu, dyshohet se gjatë konfliktit me armë zjarri është plagosur edhe një shtetas tjetër, i cili ende nuk është paraqitur për ndihmë mjekësore dhe nuk është identifikuar. Nga veprimet e para hetimore dhe informacionet e siguruara në vendngjarje, dyshohet se shtetasi L. T. ka vrarë me armë zjarri shtetasin R. I. dhe më pas është larguar nga vendi i ngjarjes së bashku me personat e tjerë të përfshirë dhe me shtetasin që dyshohet se ka mbetur i plagosur”, thuhet në njoftime policisë.
Nga sherri në lokal te vrasja e Rexhep Ismailit, zbardhet dinamika e krimit
“Shërbimet e Policisë kanë ngritur pika kontrolli dhe po krehin zonën për kapjen e autorit dhe të personave të përfshirë në konflikt. Njëkohësisht, po ushtrohen kontrolle në spitalet rajonale dhe në klinikat private, me qëllim identifikimin dhe gjetjen e shtetasit të dyshuar të plagosur. Grupi hetimor ndodhet në vendngjarje dhe, nën drejtimin e Prokurorisë, vijon veprimet për zbardhjen e plotë dhe dokumentimin ligjor të ngjarjes”, vijon njoftimi i “bluve”.