Tragjedi në Shkodër, zjarri në një banesë i merr jetën një të reje dhe dy fëmijëve të saj
Një ngjarje tragjike ka ndodhur mesditën e së mërkurës në fshatin Domen, në Shkodër, ku një banesë është përfshirë nga flakët.
Si pasojë e zjarrit, kanë humbur jetën një 24-vjeçare dhe dy fëmijët e saj të mitur. Forcat zjarrfikëse dhe shërbimet e emergjencës kanë ndërhyrë në vendngjarje, por fatkeqësisht nuk kanë mundur t’i shpëtojnë viktimat.
Autoritetet kanë nisur hetimet për të përcaktuar rrethanat dhe shkaqet që çuan në shpërthimin e zjarrit, ndërsa pritet që ekspertiza të hedhë më shumë dritë mbi ngjarjen e rëndë.
Njoftimi i Policisë:
Rreth orës 13:10, në fshatin Domen, Shkodër, ka rënë zjarr dhe është djegur banesa në pronësi të shtetasit B. Ç.
Shërbimet e Policisë dhe punonjësit e shërbimit zjarrfikës, pas marrjes së njoftimit, kanë shkuar në vendngjarje.
Nga veprimet e para dyshohet se, si pasojë e zjarrit, kanë humbur jetën shtetasja B. Ç., 24 vjeçe, dhe dy fëmijë të mitur, përkatësisht 3 vjeç dhe 1 vjeç e gjysmë.
Grupi hetimor, nën drejtimin e Prokurorisë, po punon për përcaktimin e shkakut të rënies së zjarrit dhe dokumentimin e plotë të rrethanave të ngjarjes.