Ministrja e Shëndetësisë dhe Mirëqenies Sociale, Evis Sala, është përfshirë në listën prestigjioze të “100 Grave Influencuese në Onkologji 2026”, të publikuar nga platforma ndërkombëtare OncoDaily.

Në listën e saj, platforma ka publikuar 10 emrat e parë për këtë vit, mes të cilëve renditet edhe Sala, e vlerësuar për kontributin në politikat shëndetësore dhe veçanërisht për angazhimin në trajtimin dhe parandalimin e kancerit në Shqipëri.

Sipas OncoDaily, gjatë drejtimit të saj në Ministrinë e Shëndetësisë, onkologjia është vendosur në fokus të reformave të sistemit shëndetësor shqiptar.

Në vlerësim përmenden nisma të tilla si krijimi i një Instituti Kombëtar të Onkologjisë dhe Rrjeti Kombëtar i Kancerit, si dhe prezantimi i protokolleve të standardizuara për trajtimin e pacientëve me sëmundje tumorale.

Platforma evidenton gjithashtu zgjerimin e kapaciteteve rajonale për kimioterapinë dhe radioterapinë, rritjen e financimit për barnat kundër kancerit dhe forcimin e programeve të depistimit për kancerin e qafës së mitrës dhe parandalimin e HPV-së.

Në profilin e saj, OncoDaily vlerëson edhe karrierën akademike dhe profesionale të Salës, e cila është profesore e Radiologjisë në Università Cattolica del Sacro Cuore në Romë dhe ka drejtuar më herët Departamentin e Imazherisë Diagnostike dhe Radioterapisë në Fondazione Policlinico Universitario Agostino Gemelli IRCCS.