Ish-kandidati për deputet i Partisë Demokratike, Ethem Aga, ka bërë një thirrje të fortë publike qytetarëve për të marrë pjesë në protestën kombëtare të PD-së, e paralajmëruar për datën 24 janar, duke kërkuar një mobilizim masiv dhe një angazhim maksimal. Në një postim të gjatë në Facebook, Aga theksoi se protesta e 24 janarit nuk duhet të jetë si ato të mëparshmet, as në formë dhe as në qëllim.
Ai theksoi se Shqipëria ndodhet në krizën më të thellë politike, ekonomike dhe ligjore, dhe se koha po bëhet armiku më i madh i qytetarëve. Aga bëri thirrje që protesta të mos jetë një tubim për të mbushur sheshet, por një manifestim me ide të qarta, vendosmëri dhe një qëllim të përbashkët. Ai kërkoi që kjo të jetë një protestë qytetare, ku flamuri kombëtar të jetë mbi çdo flamur politik, duke ftuar qytetarët që nuk janë të angazhuar politikisht të bashkohen për të rikthyer shpresën dhe për të vendosur standarde të reja për të ardhmen.
“Ejani për të mos ikur. Mos të lëvizim nga bulevardi më 24”, u shpreh Aga, duke nënvizuar se numrat nuk mjaftojnë dhe se është e nevojshme që protesta të ketë një drejtim të qartë. Ai e cilësoi situatën aktuale si një “emergjencë kombëtare”, duke theksuar se çdo ditë që kalon e mbajtur në këmbë një qeveri të korruptuar është një dëm i madh për demokracinë e vendit.
Aga bëri thirrje për pjesëmarrjen e anëtarëve, simpatizantëve dhe votuesve të PD-së, duke i quajtur ata të jenë në shesh si një detyrim moral dhe shpirtëror për të mbrojtur demokracinë dhe për të parandaluar rrëshqitjen e Shqipërisë drejt diktaturës. Ai theksoi se “kthim pas nuk duhet të ketë”, duke shtuar se sakrifica duhet të nisej nga vetja dhe se protestën e 24 janarit e cilësoi si një moment vendimtar për demokracinë dhe të ardhmen e Shqipërisë.