Organizata e Kombeve të Bashkuara në Shqipëri ka përsëritur apelin për dialog konstruktiv mes palëve, me qëllim uljen e tensioneve në vend dhe respektimin e standardeve demokratike.
Në reagimin e saj, OKB thekson se dhuna dhe shkatërrimi i pronës publike apo private janë të papranueshme dhe nuk kanë vend në një shoqëri demokratike e paqësore.
Organizata nënvizon gjithashtu rëndësinë e respektimit dhe mbrojtjes së të drejtës për tubim paqësor dhe të lirisë së shtypit, duke i cilësuar ato si të drejta themelore që duhet të garantohen.
Një tjetër pikë e theksuar në mesazh është veprimtaria e forcave të rendit, e cila, sipas OKB-së, duhet të jetë në përputhje me parimin e proporcionalitetit. Po ashtu, çdo person duhet të gëzojë garancitë për një proces të rregullt ligjor.
Apeli vjen në një klimë të tensionuar në vend, ndërsa OKB u bën thirrje palëve të shmangin dhunën, të respektojnë të drejtat themelore dhe të angazhohen në dialog për zgjidhjen e situatës.