Ambasada palestineze proteston ndaj deklaratës së Panaritit
Ambasada palestineze në Tiranë reagoi ndaj deklaratës së Ministrisë së Jashtme të Shqipërisë në lidhje me konfliktin aktual që po zhvillohet në Gaza, duke u ankuar për qëndrimin e theksuar pro izraelit të vendit tonë. Ambasada e Palestinës theksoi se deklarata e Ministrisë sonë të Jashtme të drejtuar nga Edmond Panariti, është më ekstreme se sa deklaratat e vendeve europiane apo Shteteve të Bashkuara të Amerikës.
“Ministria e Punëve të Jashtme dënon ashpër sulmet raketore të Hamasit dhe fraksioneve të tij kundrejt shtetit të Izraelit dhe bën thirrje për ndalimin e menjëhershëm të dhunës dhe për rivendosjen e paqes”, thuhet në një deklaratë të publikuar më 16 nëntor. Në të njëjtën ditë, Izraeli kreu një bombardim në Gaza, ku u vra një zyrtar i Hamasit dhe shumë civilë të pafajshëm.
“Ne nuk kemi konstatuar më parë asnjë deklaratë, e cila bën përgjegjëse palën izraelite për zgjerimin e territoreve të saj (siç bëri Europa dhe SHBA-ja), apo për sulmet e armatosura izraelite ndaj popullsisë palestineze, duke djegur fshatra, kisha, xhamia, apo duke vrarë dhe dëbuar banorët e qytetit të Jerusalemit, apo duke mbajtur të izoluar qytetin e Gazës për disa vite me radhë”, thotë ambasada palestineze në reagimin e saj ndaj Ministrisë sonë të Punëve të Jashtme.
“Ambasada palestineze në Shqipëri, gjithashtu shfrytëzon rastin t’i drejtohet popullit mik shqiptar, kudo që ndodhet, për t’i uruar përzemërsisht Gëzuar 100-Vjetorin e Pavarësisë, lumturi dhe zhvillim kurdoherë! Njëkohësisht theksojmë se edhe populli palestinez ka të drejtë të festojë Pavarësinë e tij dhe për ta arritur këtë ka shumë nevojë për mbështetjen e njerëzve të lirë në botë”, thuhet në deklaratën e ambasadës palestineze në Tiranë publikuar në faqen e saj të internetit.
Qëndrimi i Shqipërisë në konfliktin Izrael-Palestinë ndryshoi rrënjësisht vitin e kaluar, duke u bërë vendi më pro izraelit në rruzullin tokësor.