Partia Demokratike ka hapur zyrtarisht garën për identifikimin dhe përzgjedhjen e kandidatëve që do ta përfaqësojnë në zgjedhjet vendore të 9 majit 2027.
Kreu i demokratëve, Sali Berisha, së bashku me Sekretarin e Përgjithshëm, Flamur Noka, kanë nënshkruar udhëzimin që rregullon mënyrën e propozimit dhe kriteret që duhet të përmbushin pretendentët për drejtimin e bashkive.
Sipas dokumentit, procesi do të shtrihet në të gjitha degët e Partisë Demokratike në vend, duke synuar një përfshirje më të gjerë se strukturat tradicionale të forcës politike.
Përveç anëtarëve dhe drejtuesve lokalë të PD-së, në propozimin e emrave do të kenë mundësi të kontribuojnë edhe simpatizantët, përfaqësuesit e shoqërisë civile, akademikët, profesionistët dhe qytetarët e angazhuar në komunitetet përkatëse.
Udhëzimi përcakton se kandidatët duhet të gëzojnë figurë të pastër, integritet moral dhe profesional, reputacion të mirë publik, si dhe të kenë përfunduar arsimin e lartë. Një tjetër element që do të merret në konsideratë është përvoja në jetën publike dhe kontributi i dhënë ndër vite në Partinë Demokratike ose në nisma me interes qytetar.
Shqyrtimi i propozimeve do t’i besohet një Komisioni Seleksionimi të përbërë nga pesë anëtarë. Ky komision do të vlerësojë kandidaturat në bazë të kritereve të përcaktuara dhe do t’i paraqesë Kryesisë së PD-së emrat që konsiderohen të përshtatshëm për të vijuar në fazat e tjera të procesit.
Ndërkohë, deputetët demokratë dhe kryetarët aktualë të bashkive do të konsiderohen automatikisht të kualifikuar për fazat pasuese të përzgjedhjes.
Kandidaturat mund të paraqiten si përmes propozimeve nga strukturat partiake, ashtu edhe nëpërmjet vetëkandidimit. Çdo propozim duhet të shoqërohet me dokumentacionin përkatës dhe të depozitohet pranë sekretariatit të PD-së.
Afati i fundit për dorëzimin e emrave është caktuar data 30 nëntor 2026, pas së cilës pritet të nisë shqyrtimi dhe filtrimi i kandidaturave për zgjedhjet e ardhshme vendore.