Reshjet e dendura të shiut që kanë përfshirë Shqipërinë gjatë ditëve të fundit kanë shkaktuar probleme të shumta, veçanërisht në Bashkinë e Kurbinit. Qyteti i Laçit është përballur me vërshime të ujit, duke sjellë vështirësi për banorët, ndërsa në zonat e Gjormit dhe Zhejes janë raportuar përmbytje të konsiderueshme.
Mot i keq ka shkaktuar gjithashtu dëmtime në rrjetin elektrik, sidomos në zonat rurale, duke sjellë mungesë të energjisë elektrike. Grupi i OSHEE-së është angazhuar menjëherë në terren dhe po punon për të riparuar defektet e shkaktuara, ndërsa bashkitë kanë mobilizuar mjete dhe punonjës për të larguar inertet dhe për të normalizuar trafikun.
Po ashtu, situata ka ndikuar edhe në punën e HEC-eve, ku prurjet janë rritur ndjeshëm në disa pika, veçanërisht në Qafë Mollë dhe Ulzë. Sipas autoriteteve, megjithatë, nuk është arritur niveli kritik që kërkon hapjen e portave të diga, por situata po mbahet nën vëzhgim të vazhdueshëm nga strukturat e Mbrojtjes Civile.
Për momentin, fokusimi është te minimizimi i pasojave dhe parandalimi i përkeqësimit të situatës, me prioritet për t’u dhënë ndihmë banorëve dhe rikthyer normalitetin në zonat e prekura.