Një operacion i gjerë policor kundër shpërndarjes së lëndëve narkotike është duke u zhvilluar në Sarandë. Aksioni i ndërmarrë nga strukturat vendore të policisë ka çuar deri tani në shoqërimin dhe ndalimin e disa personave, ndërsa janë zbuluar drogë dhe armë zjarri.
Burime bëjnë me dije se hetimet janë përqendruar te një grup i dyshuar për furnizimin dhe shpërndarjen e kokainës dhe kanabisit në qytet dhe në zonat turistike të bregdetit. Mes të ndaluarve dyshohet se ka edhe persona me rol drejtues, të cilët konsiderohen organizatorë të aktivitetit të paligjshëm.
Gjatë kontrolleve të ushtruara në disa ambiente, efektivët kanë sekuestruar sasi kokaine dhe kanabisi, si dhe armë zjarri që dyshohet se mbaheshin nga pjesëtarët e grupit.
Operacioni vijon dhe për këtë arsye numri përfundimtar i personave të ndaluar dhe sasia e plotë e materialeve të sekuestruara nuk janë bërë ende të ditura. Autoritetet pritet të publikojnë informacion më të detajuar pas përfundimit të veprimeve hetimore.