Presidenti i Republikës së Shqipërisë, Bajram Begaj, ka marrë një sërë urimesh nga liderët e shteteve rajonale, evropiane dhe botërore për 28 Nëntorin, Ditën e Pavarësisë së Shqipërisë.

Një mesazh i veçantë ka ardhur nga Presidenti amerikan, Donald Trump, i cili në telegramin e tij dërguar Presidentit Begaj shprehu urimet më të mira për popullin shqiptar dhe riafirmoi angazhimin e Shteteve të Bashkuara për forcimin e bashkëpunimit mes dy vendeve. Trump theksoi se Shqipëria dhe Shtetet e Bashkuara gëzojnë një partneritet të ngushtë, me fokus në sigurimin e stabilitetit rajonal, luftën kundër organizatave kriminale ndërkombëtare dhe zgjerimin e mundësive të biznesit dhe tregtisë.

“Në emër të popullit të Shteteve të Bashkuara, ju dërgoj urimet tona më të mira juve dhe popullit të Shqipërisë ndërsa festoni pavarësinë tuaj. Shtetet e Bashkuara dhe Shqipëria gëzojnë një partneritet të fortë të krijuar nga lidhje të ngushta sigurie, ekonomike dhe njerëzore. Pres me padurim forcimin e bashkëpunimit tonë mbi prioritetet e përbashkëta”, thuhet në telegramin e Trump.

Në përgjigjen e tij, Presidenti Begaj e ka falenderuar Presidentin Trump dhe Shtetet e Bashkuara për mbështetjen dhe urimet e ngrohta. “Shqipëria mbetet e përkushtuar për të punuar me Shtetet e Bashkuara mbi prioritetet tona të përbashkëta. Shqipëria gjithmonë ka qëndruar dhe do të qëndrojë gjithmonë përkrah Shteteve të Bashkuara”, shkruan Presidenti Begaj në mesazhin e tij të shpërndarë për publikun.