Prej vitesh tashmë, kompanitë mashtruese Forex e kanë kthyer vendin tonë si strehën e tyre, duke u përhapur në mënyrë të frikshme.
I ftuar në emisionin “Zona Zero”, eksperti i ekonomisë Pano Sako deklaroi se këto kompani mashtruese e zgjedhin Shqiërinë për të zhvilluar aktivitetin e tyre për dy arsye: Për mungesën e ligjit që do i kontrollonte këto aktivitete dhe po ashtu sepse Shqipëria është një vend ku mund të pastrojnë lirshëm paratë e pista të përfituara.
“Tek ne janë shtuar shumë, duhet të përforcohet kontrolli dhe në këtë fushë. Duhet kontrolluar me mjete të tjera dhe jo me mjetet që ne jemi mësuar të kryejmë hetimet e mëparshme
Shqipërinë e zgjedhin sepse ka vakum ligjor për të mbikëqyrur këtë aktivitet të paligjshëm. Nuk ka një institucion apo mënyra të posaçme për të mbikëqyrur këtë aktivitet. Duhet të ndërhyjmë, të krijojmë një kuadër ligjor. Duhet të nisim kontrollet dhe besoj se është çështje kohe që kjo të bëhet. Shqiptarët nuk kanë vuajtur shumë, këto janë të adresuar në shtete të tjera më të pasur.
Këtu nuk është problem pastrimi i parave, këtu është kthyer në shkallë industriale. Shqipëria është tërheqëse për ata që kanë synim mashtrimin. Mashtruesit në fakt nuk janë shumë. Ata zgjedhin Shqipërinë për dy arsye: vakumi ligjor dhe lirshmëria për të lëvizur produktin e tyre dhe për ta pastruar më pas.”- deklaroi ai.
