Rama: Do të rrisim pagat për të mbajtur talentin në shërbimin publik dhe jo te privatët

Kryeministri Edi Rama ka prezantuar Igli Tafën si Drejtor të ri të AKSHI. Gjatë fjalës së tij, Rama theksoi se është dramatike që në rastin e dosjes së AKSHI-t, në vend të funksionimit të prezumimit të pafajësisë, ka ndodhur e kundërta, duke krijuar një situatë të vështirë për institucionin.

Rama theksoi rëndësinë e punës që bën AKSHI për Shqipërinë, duke e krahasuar atë me një hap të rëndësishëm për zhvillimin e vendit. “Nëse AKSHI nuk do të ekzistonte, Shqipëria do të kthehej në epokën e gurit,” tha ai. Kryeministri po ashtu theksoi se, pavarësisht hetimeve që po zhvillohen, duhet të mbetet i qartë fakti që çdo individ duhet të prezumohet i pafajshëm deri në momentin që prokurorea të provonte të kundërtën.

Rama foli gjithashtu për angazhimin e qeverisë për të përmirësuar kushtet e punës për ata që punojnë në administratën publike, duke premtuar rritje pagash dhe duke nënvizuar rëndësinë e ruajtjes së talentëve në sektorin publik. Ai shtoi se përmes reformave legjislative do të bëhen përpjekje për të siguruar që të rinjtë të besojnë në mundësitë e ofruara nga shërbimi publik dhe të kontribuojnë për përmirësimin e shoqërisë.