Kryeministri Edi Rama ndodhet ditën e sotme në Kavajë, ku po bëhet shpërndarja e banesave të reja të rindërtuara pas tërmetit.
Gjatë fjalës së tij, Rama nuk ka kursyer ironinë për Partinë Demokratike, teksa tha se bravat e dyerve të shtëpive të reja që kanë marrë qytetarët, i kanë të sigurta, e i këshilloi të kenë kujdes “mos ua marrin të tjerët”.
“Pas kaq shumë pune me jo pak vështirësi, dhënia e çelësave për gjithë këto familje, për gjyshër gjyshe prindër fëmijë e shumëkënd ndër ju që me të drejtë ka qenë mosbesues, dyshues e mbase e tani që flasim mund të ketë ndonjë që akoma nuk e beson që kjo është realitet e jo një ëndërr.
Askush s’duhet të ketë merak nga ju që keni ardhur këtu, bravat i keni të sigurta, bravat janë të lira. Bëni kujdes se mos vijnë ata të tjerë e ua bllokojnë prapë se jeni nga Kavaja ju e çoku ngatërroheni me ato dy gishtat.
Për ne me rëndësi, që përtej shakave i ka shërbyer të gjithëve pa dallim pa parë majtas e djathtas por vetëm drejt, duke bashkuar forcat e duke bashkuar të gjithë në komunitete të reja.
Ka akoma punë për të bërë kryetari i Bashkisë. Se pjesa tjetër vjetërsia s’mund të rrijë më ashtu, aty pasur mundësi për të krijuar terrene sportive për më të rinjtë, mjedis shumë miqësor për fëmijët, një mjedis shumë afrues për më të moshuarit, që jeta e këtij komuniteti të jetë komunitare e jo secili në banesën e vet.
Pavarësisht gjithçkaje që ju ndan e dallon në ditën e votimit, dita e votimit është një, ndërkohë janë katër vjet kur ne jetojmë së bashku, kemi sfida e halle të përbashkëta.”- tha Rama.