Kryeministri Edi Rama ka njoftuar se shërbimi i kimioterapisë në Spitalin Rajonal të Elbasanit vijon të ofrohet çdo ditë, duke u mundësuar pacientëve me sëmundje tumorale trajtim të specializuar pranë vendbanimit të tyre.
Përmes një postimi në rrjetet sociale, kreu i qeverisë theksoi se zgjerimi i këtij shërbimi synon të lehtësojë aksesin e pacientëve në trajtim, duke shmangur udhëtimet drejt qendrave të tjera spitalore.
Rama bëri të ditur gjithashtu se në periudhën në vijim do të vihen në funksion edhe nëntë njësi të reja të kimioterapisë në të gjithë Shqipërinë.
Sipas tij, zgjerimi i rrjetit të shërbimit do ta afrojë trajtimin më pranë pacientëve, do të ulë ngarkesën në Spitalin Onkologjik dhe do të përmirësojë aksesin në kujdesin shëndetësor për personat që përballen me sëmundje tumorale.