Dita e sotme, e diel, 22 nëntor, do të karakterizohet nga mot i paqëndrueshëm në vend, me alternime kthjellimesh dhe vranësirash, ndërsa në orët e pasdites dhe mbrëmjes priten reshje shiu në disa zona të Shqipërisë.
Mëngjesi do të nisë me intervale me diell dhe vranësira të pjesshme, por me kalimin e orëve vranësirat do të bëhen më të dendura, duke sjellë reshje, të cilat në zona të caktuara mund të shoqërohen edhe me shtrëngata të izoluara.
Në Tiranë, moti parashikohet kryesisht i vranët, me mundësi për reshje gjatë pjesës së dytë të ditës. Temperaturat do të luhaten nga 12 deri në 19 gradë Celsius.
Në zonat bregdetare dhe ultësirën perëndimore do të vijojë moti relativisht i butë për këtë periudhë të vitit. Vlora dhe Fieri pritet të regjistrojnë temperaturat më të larta, të cilat mund të arrijnë deri në 19 gradë.
Ndryshe paraqitet situata në verilindje dhe juglindje të vendit, ku temperaturat do të jenë më të ulëta, veçanërisht në mëngjes dhe gjatë natës. Në Peshkopi dhe Korçë pritet mot më i freskët, ndërsa në zonat malore temperaturat do të zbresin edhe më tej.
Era do të fryjë kryesisht nga jugu dhe juglindja, me intensitet të lehtë deri mesatar, por gjatë reshjeve mund të ketë edhe fuqizim të përkohshëm të saj.
