Gjykata e Posaçme ka bërë publik arsyetimin për vendimin e saj që caktuan masa sigurie ndaj zv.kryeministres Belinda Balluku, drejtorit të ARRSH, Gentian Gjyli, dhe administratorit të KESH, Erald Elezi. Gjykata argumenton se të tre ata paraqesin rrezik real për hetimin, duke theksuar se pozitat e tyre të larta shtetërore krijojnë mundësi për të ndikuar në dokumente dhe provat e hetimit.

Në arsyetim, GJKKO thekson se funksionet që ata kanë mbajtur i bëjnë ata të aftë të fshehin ose asgjësojnë prova, duke rritur rrezikun e cenimit të hetimit. Gjykata gjithashtu vlerëson se për shkak të lartësohen dënimet për akuzat që ata përballen, ekziston mundësia që ata të tentojnë të arratisen, duke u shmangur nga procesi penal.

Gjykata ka theksuar gjithashtu se për shkak të natyrës së akuzave dhe funksionit të tyre, mundësia që ata të kryejnë të njëjtat vepra penale përsëri është e lartë, veçanërisht në lidhje me procedurat e prokurimit dhe menaxhimin e fondeve publike që ata kanë administruar.

Për këtë arsye, GJKKO ka vendosur se masat shtrënguese janë të domosdoshme për të siguruar zhvillimin normal të hetimeve, ruajtjen e provave dhe shmangien e ndërhyrjeve në procesin gjyqësor. Masat e sigurisë janë cilësuar të justifikuara dhe në përputhje me Kodin e Procedurës Penale.

Pjesë nga vendimi

“Gjykata vlerëson se, në rastin konkret ekziston rreziku i largimit të të pandehurve të sipërcituar, nisur nga sanksioni dhe marzhi i lartë që parashikon ligji për veprën penale që ata dyshohen, konkretisht nga një deri në pesë vjet burgim për veprën penale të parashikuar nga neni 258 i K.Penal, duke marrë parasysh rrethanën se të pandehurit dyshohen për këtë vepër penale të kryer dy here dhe në bashkëpunim”, sqarohet në vendimin e GJKKO.

Në lidhje me rrezikun që për shkak të rrethanave të faktit dhe personalitetit të të pandehurit ai të kryejë krime të rënda ose të të njëjtit lloj me atë për të cilin po procedohet, Gjykata vlerëson se, “në rastin konkret për shkak të rrethanave të faktit dhe personalitetit të të pandehurve të sipërcituar, duke qenë në ushtrimin e funksioneve respektive të tyre për shkak të detyrës, ekziston rreziku që ata të kryejnë krime të të njëjtit lloj me atë për të cilin po procedohen, kjo lidhur me rrethanat e veprimeve të kundraligjshme të të pandehurve në disa procedura prokurimi, si dhe nisur nga fakti se të pandehurit menaxhojnë në vazhdim fondet publike për investimet publike të tjera të parashikuara për Institucionet Qëndrore që ata drejtojnë”.

Në lidhje me ekzistencën e shkaqeve të rëndësishme që vënë në rrezik marrjen ose vërtetësinë e provës Gjykata vlerëson se, “në rastin konkret ekzistojnë shkaqe të rëndësishme që vënë në rrezik marrjen ose vërtetësinë e provës në funksion të hetimit të kësaj çështjeje. pasi për shkak të detyrës që ushtron e pandehura Belinda Balluku. (aktualisht me funksionet e larta shtetërore, Zv. Kryeministër i Republikës së Shqipërisë dhe Ministër i Energjisë dhe Infrastrukturës). por dhe të pandehurit e tjerë Gentian Gjyli, (aktualisht me detyrën e Drejtorit të Përgjithshëm të Autoritetit Rrugor Shqiptar), Frald Elezi, (me detyrën e Administratorit të Koorporates Elektroenergjitike Shqiptare SH.A). ekziston mundësia që ata të mund të ndërhyjnë dhe të ndikojnë në prishjen ose asgjësimin e provave, në krijimin e rrethanave që vështirësojnë mbledhjen e provave, kjo nisur nga fakti që organi procedues po verifikon çdo dokumentacion të administruar nga Institucionet”