Ish-Presidenti i Republikës, Ilir Meta, ka dalë sërish këtë të martë nga ambientet e paraburgimit për të marrë pjesë në pritjet e ngushëllimeve të organizuara pas humbjes së babait të tij, Rexhep Meta.
Nën masa të posaçme sigurie dhe i shoqëruar nga punonjës të Policisë së Burgjeve, kreu i Partisë së Lirisë mbërriti në ambientet ku familja po pret vizitat e të afërmve, miqve dhe personaliteteve publike që po shprehin solidaritetin e tyre në këto momente të vështira.
Mes personave që i bënë një vizitë ngushëllimi ishte edhe lideri i Partisë Demokratike, Sali Berisha. Kryedemokrati u pa duke hyrë në hotelin ku po zhvillohen pritjet për t’i përcjellë ngushëllimet Metës dhe familjarëve të tij.
Një ditë më parë, Ilir Meta u lejua nga autoritetet përkatëse të merrte pjesë në ceremoninë mortore të babait të tij, e cila u zhvillua në fshatin Çepan të Skraparit. Dalja e tij nga institucioni i vuajtjes së dënimit u realizua në përputhje me procedurat ligjore që zbatohen në raste të veçanta familjare.
Ndërkohë, gjatë gjithë ditës pritet që figura politike, përfaqësues institucionesh dhe qytetarë të shumtë të vijojnë të paraqiten për t’i shprehur ngushëllimet ish-presidentit dhe familjes Meta.