Forca të shumta policie janë vendosur këtë të enjte në zonën përreth Kuvendit të Shqipërisë, ku po zhvillohet protesta e paralajmëruar në të njëjtën ditë me seancën plenare.
Masat e sigurisë janë shtuar që përpara nisjes së tubimit. Efektivët kanë krijuar një perimetër sigurie rreth godinës së Parlamentit, ndërsa në disa prej rrugëve hyrëse janë vendosur barriera metalike dhe kordonë policorë.
Protesta ishte njoftuar prej disa ditësh, ndaj autoritetet kanë marrë masa për menaxhimin e tubimit dhe garantimin e zhvillimit të seancës parlamentare.
Në të njëjtën kohë, brenda Kuvendit parashikohet një ditë e ngarkuar me diskutime. Pjesë e punimeve do të jenë katër interpelanca urgjente me anëtarë të kabinetit qeveritar.
Deputetët pritet gjithashtu të shqyrtojnë dhe votojnë projektligjin që lidhet me statusin e gjyqtarëve dhe prokurorëve në Republikën e Shqipërisë.
Axhenda parlamentare përfshin edhe një sërë marrëveshjesh dhe nismash ligjore në fusha të ndryshme. Mes tyre janë çështje që lidhen me Ukrainën, inteligjencën artificiale, sektorin e ullirit, pagat e gjyqtarëve dhe prokurorëve, disenjot, si dhe rregullimin e tregut të shoqërive me ofertë publike.
Ndërsa deputetët zhvillojnë punimet brenda sallës, jashtë godinës së Parlamentit policia vijon të mbajë në fuqi masat e shtuara të sigurisë për shkak të protestës.