Shkrumbohet ‘shtëpia e barit’ në Angli! Përfundojnë me djegie te rëndë dy shqiptarë nga Tepelena

Një banesë në rrugën Shrewsbury Close, në zonën Bloxwich të Walsall, ka shpërthyer në flakë, duke lënë të plagosur katër persona.

Ngjarja e rëndë ndodhi të hënën, ndërsa autoritetet britanike dyshojnë se shkak i zjarrit është bërë një rrjedhje gazi nga një bombol brenda shtëpisë.

Policia ka konfirmuar se banesa përdorej si ‘shtëpi bari’ për kultivimin e kanabisit. Në vendngjarje u angazhuan 65 zjarrfikës për të vënë flakët nën kontroll, ndërkohë që hetimet janë ende në vazhdim.

Një shqiptar në Birmingham, i njohur me rrethanat e rastit, tha për Top Channel se dy nga të plagosurit janë shqiptarë nga Tepelena. Njëri prej tyre ka marrë djegie në 30% të trupit, ndërsa tjetri ndodhet në gjendje të rëndë, me 60% djegie dhe po trajtohet në spital.

Policia po punon për të dokumentuar tërësisht rastin dhe për të identifikuar të përfshirët në këtë veprimtari të paligjshme.