Kryeministri Edi Rama deklaroi se qeveria ka vendosur tashmë në funksion një mekanizëm të qëndrueshëm për rritjen vjetore të pensioneve.
Gjatë një interviste në podcastin e tij “Flasim”, ai bëri të ditur se rritja e aplikuar në janar të këtij viti do të vijojë me ritme progresive në vitet në vijim. Sipas tij, kjo rritje do të dyfishohet në janarin e ardhshëm, do të trefishohet në vitin 2028, do të katërfishohet në 2029 dhe do të arrijë në pesëfishim në vitin 2030.
Rama theksoi gjithashtu se po punohet për ndërtimin e një shtylle të dytë të sistemit të pensioneve, e cila do të funksionojë si mbështetje shtesë krahas skemës aktuale. Kjo qasje synon të krijojë një mundësi të re sigurie financiare për qytetarët në të ardhmen.
Sipas konceptit të prezantuar, çdo punonjës që zgjedh të kontribuojë me një shumë simbolike nga paga e tij, për shembull 1 euro në muaj, do të përfitojë një kontribut të barabartë nga shteti ose nga punëdhënësi në sektorin privat. Në këtë mënyrë, kursimi individual do të dyfishohet dhe gradualisht do të krijohet një fond personal, i cili do t’i shtohet pensionit të përfituar nga skema bazë.
Kryeministri nënvizoi se kjo nuk është një risi e veçantë shqiptare, por një model i përdorur gjerësisht në vende të tjera, i cili synon të rrisë sigurinë ekonomike për moshën e tretë dhe të forcojë lidhjen mes punonjësit dhe punëdhënësit.
Ai theksoi se skema e re do të jetë plotësuese dhe nuk do të ndërhyjë në sistemin aktual të pensioneve, por do ta mbështesë dhe do ta konsolidojë atë më tej.