Kryeministri Edi Rama do të paraqesë sot në Kuvend programin e ri qeverisës për mandatin e katërt, në një seancë që nis në orën 10:00 dhe pritet të zgjasë më shumë se 24 orë. Kjo është seanca e tretë plenare brenda kësaj jave.
Sipas vendimit të marrë një ditë më parë në Konferencën e Kryetarëve, çdo deputet do të ketë në dispozicion nga 10 minuta për të folur, çka e shton kohëzgjatjen e debatit në mënyrë të konsiderueshme.
Pas fjalës së kryeministrit, foltorja i kalon opozitës, ku pritet të marrë fjalën Sali Berisha ose Gazment Bardhi, në varësi të vendimmarrjes brenda grupit. Rregullorja e Kuvendit parashikon që vetëm kryeministri dhe kreu i opozitës gëzojnë të drejtën të flasin pa kufizim kohe ose në barazi kohore me njëri-tjetrin.
Diskutimet pritet të zgjasin deri në orët e vona të natës, duke bërë që seanca të ndërpritet dhe të rifillojë ditën e premte. Në përmbyllje të debatit, do të zhvillohet votëbesimi i qeverisë së re, përfshirë kryeministrin dhe 16 ministrat, përmes miratimit të dekreteve të Presidentit Bajram Begaj.