Një përplasje verbale është regjistruar këtë të enjte në hyrje të GJKKO-së mes ish-drejtueses së SHISH, Vlora Hyseni, dhe gazetares Klodiana Lala. Episodi ndodhi përpara se Hyseni të hynte në ambientet e gjykatës për t’u njohur me masën e sigurisë “arrest në shtëpi”.
Teksa po i drejtonte pyetje lidhur me Ergys Agasin, Lala mori një përgjigje të drejtpërdrejtë nga Hyseni, e cila iu drejtua gazetares me pretendimin: “Klodi, si kalon ti në takime me agjentët serbë në dhomat e hotelit Rogner?”
Ish-drejtuesja e SHISH nuk dha sqarime të mëtejshme për deklaratën dhe nuk iu përgjigj pyetjeve të tjera të gazetarëve, përfshirë ato që lidheshin me Albin Kurtin, duke vijuar më pas drejt ambienteve të GJKKO-së.
Pas episodit, Klodiana Lala reagoi gjatë një lidhjeje të drejtpërdrejtë televizive, duke e cilësuar deklaratën e Hysenit si një sulm dhe tentativë për shantazh ndaj saj.
“Ka zgjedhur të kundërsulmojë me gjuhë vulgare ndaj gazetarëve, duke i shantazhuar ata për takime në hotele të ndryshme”, deklaroi Lala.
Gazetarja theksoi se mbetet për t’u sqaruar se cilave takime u referohej konkretisht Hyseni, ndërsa e konsideroi pretendimin e bërë ndaj saj si një akuzë të rëndë.
Ngjarja solli reagimin e Asociacionit të Gazetarëve të Shqipërisë. Në një deklaratë publike, AGSH dënoi qëndrimin e Hysenit ndaj gazetares dhe kërkoi tërheqjen e deklaratave. Organizata i bëri gjithashtu thirrje SPAK-ut që episodi të trajtohet me seriozitet.
Sipas AGSH-së, çdo person nën hetim duhet të përballet me drejtësinë për çështjet që i ngarkohen, ndërsa presioni dhe kërcënimet ndaj gazetarëve gjatë ushtrimit të detyrës nuk duhet të tolerohen.
“Çdo i dyshuar i drejtësisë duhet të japë llogari vetëm përpara drejtësisë, ndërsa shantazhet ndaj gazetarëve nuk mund të tolerohen”, thuhet ndër të tjera në reagim.
Përplasja Hyseni-Lala është komentuar edhe nga Unioni i Gazetarëve Shqiptarë, i cili e lidhi rastin me një tjetër episod të ndodhur gjatë së njëjtës ditë, shoqërimin nga policia të gazetares së Citizens.al, Vjolanda Peca, teksa raportonte nga protesta pranë Kuvendit.
UGSH kërkoi nga ministri i Brendshëm, Ervin Demo, dhe drejtori i Përgjithshëm i Policisë, Skënder Hita, sqarimin e rrethanave të shoqërimit të gazetares dhe marrjen e masave që situata të tilla të mos përsëriten.
Sa i përket deklaratës së Hysenit ndaj Lalës, Unioni e cilësoi atë si “shantazh dhe deklarim shqetësues”. Organizata kërkoi që pretendimi për takime të gazetares me “agjentë serbë” të sqarohet nga organet kompetente, në mënyrë që të përcaktohet nëse ekziston ndonjë bazë faktike për deklaratën.
Sipas UGSH-së, akuza të tilla të bëra publikisht ndaj një gazetari prekin drejtpërdrejt integritetin profesional dhe për këtë arsye kërkojnë transparencë dhe sqarim institucional.