Një investigim i publikuar nga revista amerikane Vanity Fair ka ngritur dyshime mbi marrëveshje financiare të fshehta mes Jared Kushner, dhëndrit dhe ish-këshilltarit të presidentit Donald Trump, dhe përfaqësuesve të lartë të Emirateve të Bashkuara Arabe dhe Arabisë Saudite.
Sipas gazetarit Matthew Cole, shërbimet sekrete holandeze arritën të siguronin akses në telefonin e Kushnerit, pasi zbuluan materiale të hakeruara nga inteligjenca ushtarake ruse. Gjatë monitorimit, ato dyshohet se identifikuan hyrje në një llogari bankare në Emiratet e Bashkuara Arabe, ku ishin transferuar qindra milionë dollarë përmes një banke në Azerbajxhan.
Investigimi pretendon se rreth 750 milionë dollarë ishin depozituar në llogarinë e quajtur “Alpha”, e cila administrohej nga një fondacion emiratës. Kushner nuk rezultonte pronar i saj, por sipas raportimit kishte autorizim për të kryer transaksione.
Revista ngre dyshime edhe për një llogari tjetër, duke pretenduar se shumat e përfshira në këto marrëveshje arrinin në të paktën 2 miliardë dollarë. Fondet dyshohet se lidheshin me interesa diplomatike dhe politike në Lindjen e Mesme.
Publikimi ka ngritur pikëpyetje mbi transparencën financiare dhe ndikimin e mundshëm të qeverive të huaja në administratën amerikane.
Megjithatë, Jared Kushner i ka mohuar kategorikisht akuzat, duke i cilësuar pretendimet si të pavërteta dhe të pambështetura në prova. Edhe avokati i tij ka kundërshtuar raportimin, duke paralajmëruar veprime ligjore.
Pretendimet e publikuara nga Vanity Fair nuk përbëjnë përfundime gjyqësore dhe mbeten të kontestuara.