Një shtetas është ndaluar në Portin e Durrësit pasi u kap me 19 mijë euro të padeklaruara gjatë kontrolleve të përbashkëta të ushtruara nga autoritetet doganore dhe Policia Kufitare.
Sipas burimeve zyrtare, shuma e parave u zbulua mbrëmjen e së martës, teksa personi po përgatitej të udhëtonte me tragetin e linjës Durrës-Bari. Paratë nuk ishin deklaruar në përputhje me detyrimet ligjore, ndaj u sekuestruan nga shërbimet përgjegjëse.
Rasti i është referuar organeve kompetente për procedurat e mëtejshme, ndërsa autoritetet kanë bërë të ditur se kontrollet në Portin e Durrësit do të vijojnë me intensitet për të parandaluar shkeljet doganore dhe tentativat për nxjerrjen e shumave të padeklaruara jashtë vendit.
Dogana Durrës thekson se operacionet e monitorimit dhe verifikimit në pikat kufitare do të vazhdojnë pa ndërprerje, në funksion të zbatimit të ligjit dhe luftës kundër aktiviteteve të paligjshme.