Një 23-vjeçare është plagosur rëndë pas një sulmi me thikë të ndodhur në stacionin Duomo të metrosë në Milano, ndërsa policia italiane ka arrestuar autorin e dyshuar, një 27-vjeçar me origjinë algjeriane.
Sipas autoriteteve, ngjarja ndodhi pasditen e së enjtes në platformën e linjës M3. Hetimet paraprake tregojnë se i dyshuari iu afrua të resë, e akuzoi se po e shikonte dhe, pas një debati verbal, e goditi fillimisht me grusht e më pas me një thikë të vogël.
Si pasojë e sulmit, e reja pësoi një prerje të thellë që shtrihet nga cepi i gojës deri në qafë. Mjekët po vlerësojnë nëse dëmtimet do t’i lënë pasoja të përhershme.
Sipas dëshmitarëve, gjatë konfliktit autori i dyshuar i është drejtuar viktimës me fjalët: “Ti je grua. Unë jam burrë dhe mysliman. Nuk duhet të më shikosh.” Hetuesit po analizojnë këto deklarata për të përcaktuar nëse sulmi ka qenë i motivuar nga urrejtja ndaj grave apo nga motive fetare.
Pas ngjarjes, 27-vjeçari u largua nga vendi i sulmit, por u lokalizua dhe u arrestua pak minuta më vonë nga patrullat e Policisë Lokale në Via Torino, vetëm disa qindra metra larg stacionit të metrosë.
Ai akuzohet për plagosje të rëndë, shkaktim të shëmtimit të përhershëm të fytyrës dhe kundërshtim të forcave të rendit.
Nga verifikimet rezultoi se i njëjti person ishte arrestuar edhe në orët e para të së njëjtës ditë për tentativë vjedhjeje të rëndë. Pas procedurës gjyqësore të përshpejtuar, ai ishte liruar me masën e ndalimit të qëndrimit në Milano, por vetëm pak orë më vonë dyshohet se kreu sulmin e rëndë në metro.