Tjetër SKANDAL/ AKU bllokon 420 tonë misër në pikën kufitare të Hanit të Hotit, dyshohet me aflatoksinë

AKU në pikën kufitare të Hanit të Hotit ka bllokuar 15 kamionë më misër, ku pesha totale e misrit të dyshuar me aflatoksinë kap shifrën e 420 tonëve.

Inspektorët e Ushqimit janë duke zbatuar urdhërin e ministrit Andis Salla i cili ka kërkuar analizim të çdo ngarkese me misër.

Më 8 nëntor, një kamion me 25 tonë misër rifuxho për bagëti nga Serbia u bllokua po ashtu në doganën e Hanit të Hotit. Kamioni po hynte në Shqipëri nga Mali i Zi, kur është ndaluar nga autoritetet shqiptare për shkak se ka rezultuar me normë të lartë aflatoksine.

Ndërsa më 14 nëntor Autoriteti Kombëtar i Ushqimit në Elbasan bllokoi një tjetër sasi prej 50 tonësh misër rifuxho për bagëti, e ardhur gjithashtu nga Serbia, pas zbatimit të urdhrit të Ministrisë së Bujqësisë për ndalimin dhe kontrollin rigoroz të produkteve të importuara nga ky vend.