Një incident me armë zjarri gjatë festivalit tradicional Old West End në qytetin e Toledos, në shtetin amerikan të Ohajos, ka lënë të paktën 12 persona të plagosur, ndërsa dy prej tyre ndodhen në gjendje të rëndë.
Ngjarja u regjistrua pasditen e së shtunës, teksa mijëra qytetarë merrnin pjesë në aktivitetin vjetor. Sipas hetimeve paraprake, autoritetet dyshojnë se të shtënat kanë ardhur nga dy persona të armatosur që mund të kenë shkëmbyer zjarr me njëri-tjetrin mes turmës.
Zëvendësshefi i Policisë së Toledos, Joe Heffernan, bëri të ditur se deri tani asnjë i dyshuar nuk është arrestuar, ndërsa forcat e rendit po vijojnë kërkimet intensive për identifikimin e autorëve.
Të plagosurit janë të moshave nga 14 deri në 61 vjeç. Kryebashkiaku i Toledos, Wade Kapszukiewicz, deklaroi se të gjitha viktimat pritet të mbijetojnë, megjithëse dy prej tyre po marrin trajtim në gjendje kritike.
Pas incidentit, policia izoloi zonën përreth festivalit dhe nisi analizimin e kamerave të sigurisë, si dhe të materialeve filmike të realizuara nga pjesëmarrësit. Autoritetet u kanë bërë thirrje qytetarëve të dorëzojnë çdo foto apo video që mund të ndihmojë në zbardhjen e ngjarjes.
Dëshmitarët përshkruan momente paniku, me pjesëmarrësit që vrapuan për t’u larguar dhe për të gjetur strehim sapo dëgjuan krismat.
Sipas të dhënave të organizatës që monitoron dhunën me armë në SHBA, ngjarja në Toledo është një nga dhjetëra rastet e të shtënave masive të raportuara në vend gjatë këtij viti. Ndërkohë, guvernatori i Ohajos, Mike DeWine, dënoi incidentin dhe theksoi se aktivitetet publike duhet të mbeten ambiente të sigurta për qytetarët dhe familjet.