Një tragjedi e rëndë ka tronditur Italinë dhe Shqipërinë, ku katër anëtarë të familjes Kola humbën jetën në qytetin e Porcarit, në provincën e Luccës, si pasojë e një rrjedhjeje të gazit nga kaldaja. Viktimat, Arti Kola, Jonida Kola, djali Hajdar Kola dhe vajza Xhesika Kola, u gjetën pa shenja jete në momentin kur karabinierët hynë në shtëpi për të ofruar ndihmë, pasi familja nuk po përgjigjej.
Kryetari i Bashkisë së Porcarit, Leonardo Fornaciari, ka shprehur tronditjen e tij për këtë ngjarje tragjike dhe ka ndarë dhimbjen me qytetin. Në një postim të tij në rrjetet sociale, ai shkruan: “Jemi të gjithë të shokuar dhe të pikëlluar nga kjo ngjarje tragjike. Komuniteti ynë bashkohet me të afërmit dhe miqtë në një përqafim simbolik për këtë humbje të rëndë që ka goditur qytetin tonë. U prehshin në paqe, të gjithë së bashku.”
Për kryebashkiakun, ky incident e ka rikthyer kujtimin e një tragjedie të ngjashme që ndodhi 34 vjet më parë, në shkurt të vitit 1992, kur katër anëtarë të familjes Malanca, një familje italiane, humbën jetën nga një rrjedhje gazi në shtëpinë e tyre. Raffaello Malanca, bashkëshortja e tij Piera dhe vajzat Ilaria dhe Greta u mbytën nga monoksidi i karbonit që u çlirua nga një defekt i kaldajës. Tragjedia e tyre ishte po ashtu një dhimbje e madhe për komunitetin dhe është kujtuar çdo vit me një park publik që mban emrin e tyre.