Një e re shqiptare, Anxhela Byku, 20 vjeçe, e cila u rrëzua nga lartësia të martën në oborrin e pallatit ku banonte në rrugën Beverora së bashku me bashkëshortin e saj, ka humbur jetën në mbrëmjen e së enjtes, më 12 mars. Ajo ndodhej e shtruar në repartin e terapisë intensive të spitalit të Piacenzës, në Itali, por nuk arriti t’u mbijetojë plagëve të rënda të pësuara.
Sipas informacioneve paraprake, dëmtimet e shkaktuara nga rënia kanë qenë shumë të rënda, ndërsa rrethanat e ngjarjes po hetohen nga karabinierët e njësisë hetimore, të cilët po përpiqen të rindërtojnë me saktësi çdo moment të tragjedisë.
Deri tani, pista që konsiderohet më e mundshme është ajo e një akti të dëshpëruar, duke qenë se vajza dyshohet të ketë qenë e vetme në banesë në momentin kur ndodhi ngjarja, çka përjashton përfshirjen e personave të tjerë.
Alarmi u dha nga një person që e gjeti 20-vjeçaren të shtrirë në oborr, duke bërë që në vendngjarje të ndërhyjë menjëherë ambulanca e Kryqit të Kuq. Ndërkohë, hetuesit kanë kryer verifikime si brenda apartamentit ashtu edhe në hapësirën përreth pallatit, si dhe kanë marrë dëshmi nga fqinjët dhe partneri i saj, për të përcaktuar nëse bëhet fjalë për një akt të qëllimshëm apo për një aksident tragjik.