Një aksident i rëndë i ka marrë jetën tragjikisht një të riu shqiptar në Itali. Mësohet se viktima është identifikuar si Francesko (Francesco) Ajdini, 18 vjeç, i cili u përfshi në një aksident rrugor dje pasdite, rreth orës 16:00, në Reggio Emilia.
Sipas raportimeve fillestare, djaloshi po udhëtonte me një motor “Scooter” kur ndodhi përplasja me një makinë. Një “Fiat” i drejtuar nga një burrë po kthehej majtas kur u përplas me skuterin e drejtuar nga 18-vjeçari, i cili po udhëtonte drejt Reggio-s. I riu, i cili mbante një helmetë, përfundoi në asfalt.
Vullnetarët e Kryqit të Kuq dhe njësia e Ndihmës Publike nga Parma nxituan në vendngjarje; u dërgua edhe një helikopter shpëtimi. Paramedikët u përpoqën ta ringjallnin, por plagët e marra nga përplasja me rrugën rezultuan shumë serioze.
