Një ngjarje e rëndë është regjistruar në Brooklyn, Nju Jork, ku një 41-vjeçar shqiptar humbi jetën tragjikisht. Burim Havolli nga Kosova u përpoq që të ndalonte një person që të vidhte pako në hollin e ndërtesës ku punonte si mbikëqyrës.
Bëhet e ditur se ngjarja ndodhi të mërkurën në mëngjes në Ocean Avenue, në zonën Flatbush.
Policia u thirr rreth orës 08:00 dhe gjeti 41-vjeçarin me lëndime të rënda në kokë. Ai u dërgua menjëherë në spitalin Kings County, por nuk arriti t’u mbijetonte plagëve.
Ndërkohë fqinjët thanë se Havolli u sulmua teksa tentonte të ndalonte grabitësin e pakove. Banorët e zonës u shprehën të tronditur, duke theksuar se lagja po bëhet gjithnjë e më e pasigurt.
Familjarët e viktimës e përshkruan Burimin si një njeri punëtor dhe të respektuar, i cili humbi jetën duke bërë detyrën e tij.
Policia po heton motivin e sulmit. Një person i interesuar është marrë në pyetje, por ende nuk janë ngritur akuza.