Sot, Gjykata Kushtetuese zhvillon seancën për ish-zëvendëskryeministren Belinda Balluku, e cila ka apeluar ndaj vendimit të Qeverisë për pezullimin nga detyra pas vendimit të Gjykatës së Posaçme të Shkallës së Parë (GJKKO). Çështja ka të bëjë me akuzat për përfshirje të Ballukut në aferat korruptive që lidhen me dy projekte të mëdha infrastrukturore, tunelin e Llogarasë dhe Unazën e Madhe.
Vendimi i GJKKO për pezullimin e saj nga detyra ka ngritur shqetësime dhe kërkesën për shqyrtim në Gjykatën Kushtetuese, që pritet të vendosë nëse do të kalojë çështjen për shqyrtim të plotë. Shtyrja e shqyrtimit të kërkesës, e parashikuar më herët për 2 dhjetor, erdhi pas largimit të gjyqtares Holta Zaçaj nga trupa gjykuese. Ajo u zëvendësua nga gjyqtarja Marsida Xhaferllari, e cila kërkoi kohë për t’u njohur me materialet e çështjes.
Nëse Kolegji i Gjykatës Kushtetuese vendos ta kalojë çështjen për shqyrtim, do të shqyrtohet edhe mundësia e shuarjes së efekteve të pezullimit të Ballukut, derisa të merret një vendim përfundimtar.
Belinda Balluku është hetuar për abuzime me tenderët në lidhje me tunelin e Llogarasë dhe Unazën e Madhe, dy projekte të rëndësishme infrastrukturore. Akuzat dyshojnë se fituesit e tenderëve janë paracaktuar, dhe për këtë arsye është pezulluar nga detyra si ministre e Infrastrukturës dhe Energjisë. Ajo gjithashtu ka një ndalim për të dalë jashtë vendit.
Prokuroria e Posaçme ka bërë të ditur se po heton edhe disa procedura të tjera prokurimi që lidhen me këto projekte.