Kryepeshkopi i Shqipërisë, Anastas Janullatos, është shtruar në spitalin “Evangelismos” në Athinë, ku ndodhet në gjendje kritike për jetën, sipas raportimeve të fundit. 95-vjeçari, i cili ka një histori të komplikuar mjekësore, u transportua me avion nga Shqipëria mëngjesin e së premtes, pasi shëndeti i tij u përkeqësua pas shfaqjes së simptomave të një viroze.
Në Tiranë, mjekët e kishin shtruar fillimisht, por pas përkeqësimit të mëtejshëm të gjendjes, u mor vendimi për transferimin e tij në Greqi, ku ekipi mjekësor i spitalit “Evangelismos”, i drejtuar nga profesoresha e Pulmologjisë dhe Kujdesit Intensiv, Anastasia Kotanidou, ka marrë përsipër monitorimin e gjendjes së tij. Shëndeti i Kryepeshkopit të Shqipërisë është ndjekur me kujdes, ndërkohë që informacionet më të fundit flasin për një përkeqësim të mëtejshëm të gjendjes mbrëmjen e së shtunës.