Një ngjarje e çuditshme dhe e dhunshme ka ndodhur mbrëmjen e së hënës në lagjen “24 Maji” të Vlorës, ku mbeti i plagosur 30-vjeçari Bledar Skënderaj. Siç konfirmohet nga burime të sigurta të policisë, konflikti ka shpërthyer pas një përplasjeje të thjeshtë mes dy makinave, por kjo ka çuar në një përshkallëzim të papritur dhe të dhunshëm.
Përplasja ka ndodhur mes dy makinave, njërit të drejtuar nga Bledar Skënderaj dhe tjetri nga Andreino Lena. Pavarësisht dëmeve të vogla materiale në makinat përkatëse, tensionet kanë shpërthyer dhe të dy shoferët kanë filluar të diskutojnë për fajin dhe për mënyrën se si do të kompensohej dëmi. Në këtë moment ka ndërhyrë një i tretë, Edi Latifaj, i cili është përpjekur të qetësojë situatën. Ai ka dalë nga makina dhe ka vendosur parakolpin që ishte nxjerrë jashtë vendit, duke u thënë të rinjve të mos vazhdonin me grindje, pasi makinat nuk kishin pësuar dëme serioze.
Pavarësisht mundimit të Latifajt për të ndalur përplasjen verbale, situata ka marrë një kthesë të papritur. Të rinjtë që ishin në konflikt, Bledar Skënderaj dhe Andreino Lena, që nga momenti i ndërhyrjes së Edi Latifajt, janë bërë bashkë dhe kanë nisur ta sulmojnë fizikisht atë. Ata e kanë goditur me shkelma dhe grushta dhe më pas e kanë përzënë deri afër shtëpisë së Latifajt, ku ka ndodhur dhuna e mëtejshme.
Në këtë moment, Edi Latifaj është futur në banesën e tij, ka marrë një thikë dhe është kthyer për të hakmarrë. Ai ka sulmuar të rinjtë duke goditur me shkelma dhe grushte Andreino Lenën dhe më pas e ka goditur Bledar Skënderajn me thikë në kraharor dhe qafë, duke e lënë atë të plagosur rëndë.
Policia ka mbërritur menjëherë në vendngjarje dhe ka arrestuar Edi Latifajn, teksa i është gjetur thika me të cilën ai ka kryer sulmin. Ai akuzohet për “Plagosje të rëndë me dashje” dhe “Prodhimi, mbajtja, blerja apo shitja pa leje e armëve të ftohta”. Ndërsa Andreino Lena është arrestuar për “Moskallëzim krimi”, pasi nuk ka raportuar ngjarjen si dhe është gjetur me një thikë në posesionin e tij. Ai gjithashtu akuzohet për “Prodhimi, mbajtja, blerja apo shitja pa leje e armëve të ftohta”.