Prokuroria e Tiranës brenda afatit 1 vjeçar ka mbyllur hetimet ndaj dy vëllezërve Shkëlqim dhe Florjan Dukaj, duke i cilësuar ata si të dyshuarit kryesorë për ngjarjen e rëndë të ndodhur në 13 nëntor 2024, ku mbeti i vrarë biznesmeni me origjinë nga Dibra, Eduart Reçi.
Të dy vëllezërit Dukaj, që nga momenti kur janë arrestuar dhe deri në këtë fazë nuk kanë pranuar autorësinë e krimit, duke pretenduar se kanë pasur njohje me viktimën, por në asnjë moment nuk kanë marrë pjesë në vrasjen e tij.
Lidhur me këtë ngjarje të rëndë është marrë në pyetje nga ana e policisë kriminale edhe gruaja e viktimës së Eduart Reçit, e cila në dëshminë e saj ka deklaruar se bashkëshorti i saj kishte konflikte të theksuara me të gjithë komshinjtë që ishin kufitarë me pronën e tij. Gruaja e viktimës ka dhënë dy herë deklarim në polici, duke treguar fillimisht se me të gjithë komshinjtë dhe qiramarrësit Eduarti ka pasur konflikte, por vetë ajo nuk ishte në gjendje të jepte informacion se ku dyshonte për vrasjen.
“…bashkëshorti im ndër vite ka ndërtuar në Tiranë dy pallate dhe një vilë, lokal “Folium Lounge” dhe të gjitha njësitë e banimit, garazhe, njësitë tregtare, vila e prona të tjera i ka dhënë me qëra tek persona të ndryshëm…”– ka pohuar gruaja.
Gruaja e Eduart Reçit, pas vrasjes së tij ka drejtuar gishtin në disa persona komshinj të tyre me të cilët biznesmeni kishte pasur konflikte të theksuara.
Ndërsa më pas në një deklarim të dytë të dhënë në policinë e Tiranës, bashkëshortja e biznesmenit të vrarë ka nxjerë dhe emrat e dy vëllezërve Shkëlqim dhe Florjan Dukaj, të cilët pas verifikimeve nga policia, u arrestuan disa ditë pas ngjarjes dhe ende vijojnë të mbahen të izoluar në ambientet e paraburgimit Nr.313 në Tiranë. Në deklarimin e para që gruaja ka dhënë në polici pas vrasjes së burrit të saj Eduart Reçi, ajo ka treguar se bashkëshorti ka pasur mosmarrëveshje dhe konflikte me shumë nga personat që i kishte dhënë ambientet e me qera.
Sipas saj një ndër personat që i shoqi kishte pasur konflikte ishte qiramarrësi me inicialet I. Gjithashtu sipas gruas së viktimës Eduart Reçi ka pasur konflikt me personin H.B, pronar i një hoteli aty pranë, komshi me pronën e tyre. Shkak i sherrit mes tyre sipas gruas ka qenë kufiri ndarës i një muri mes hotelit të H.B dhe pronës së tyre që është shesh pushimi i pallatit.
“…gjithashtu një tjetër konflikt Eduart Reçi ka patur edhe me shtetasin K.Selishta, lidhur me një sipërfaqe toke e llojit arë në fshatin Zdojan të Dibrës, e cila është regjistruar në pronësi të Eduardit dhe në posedim e ka shtetasi K. Selishta”– ka treguar në polici gruaja e Eduart Reçit.
Gruaja në dy deklarimet e saj, nuk ka qenë në gjendje të përcaktojë se kush nga personat që kishin konflikte mund ti kishte vrarë burrin.
Në dëshminë e dytë që ajo ka dhënë në polici ka rrëfyer se:
”…të tjerë persona që Eduart Reçi ka patur mosmarrëveshje për çështje pronësie janë dhe dy vëllezërit Shkëlqim dhe Florjan Dukaj, pronarë të lokal ‘Polis’ ose ‘Cikos’ afër vendit të ngjarjes, pasi një pjesë e këtij lokali është ndërtuar në pronën tonë…”.
Sipas dosjes hetimore, dy ditë pas vrasjes së Eduart Reçit, më 15 nëntor 2024, familjaret e viktimës Eduart Reçi kanë dorëzuar në polici aparatin celular që përdorej prej tij, të markës “Iphone 12”. Nga këqyrja paraprake e këtij aparati celular (komunikime, foto, dokumente), ka rezultuar se viktima Eduart Reci po angazhohej për të ndërtuar një pallat, ndërtimi i të cilit kërkonte bashkëpunim dhe dakortësim edhe me persona të tjerë, kufitar me pronën e viktimës.
Në dosje thuhet se: “…nga të dhënat e siguruara në rrugë operative dhe proceduruale ndër personat me të cilët viktima Eduart Reci, ka diskutuar lidhur me këtë problematike dhe nuk ka gjetur dakortësinë për ndërtimin e këtij objektit (pallati) janë vëllezërit Florjan Dukaj dhe Shkëlqim Dukaj, pronarë të një lokali të ndërtuar me tendë dhe biznesmeni i një hoteli H.B në Tiranë…”.
Lidhur me këtë problematike, Eduart Reci ka komunikime me vëllezërit Florjan Dukaj dhe Shkëlqim Dukaj, pronarë të një lokali ngjitur me pronën e tij, si dhe persona të tjerë që në këtë rast është specialist i Policisë së zonës, që Eduart Reçi i shkuan se ato (Vëllezërit) janë të pa besë.
Policia dhe prokuroria e Tiranës, pretendojnë se vendi nga është qëlluar me pushkë snajper Eduart Reçi është tek shkallët e emergjencës së një hoteli aty afër, por largimi i autorit është bërë përmes një hapësire të ngushtë që ndodhet midis murit të hotelit dhe lokalit me tendë të ndërtuar nga dy vëllezërit e arrestuar, Shkëlqim dhe Florjan Dukaj.
Këta të fundit janë arrestuar 10 ditë pas krimit të rëndë, ndërsa asnjëri prej tyre nuk ka pranuar autorësinë e krimit, duke pretenduar se nuk janë ata autorët e vrasjes së komshiut Eduart Reçi. Prokuroria në dosjen e saj thotë se vëllezërit e zgjodhën vendin prej nga ku qëlluan, përdorën si karrem fishekzjarrë që njëri prej tyre i hodhi në oborrin e lokalit në mënyrë që shënjestra të dilte jashtë dhe tjetri ta qëllonte.