Petrit Qoli, i akuzuar për vrasje me paramendim dhe pjesëmarrës në dosjen “Plumbi i Artë”, ka hedhur akuza të forta ndaj bashkëpunëtorit të tij, Nuredin Dumani. Dumani, i cili nuk u paraqit në seancën e gjykatës për shkak të arsyeve shëndetësore, ka shkaktuar reagimin e Qolit nga qelia e burgut.
Në një deklaratë, Qoli ka shprehur mbështetje për SPAK dhe Gjykatën e Posaçme, por ka theksuar shqetësimin e tij për situatën e tij personale dhe krahasimin me Dumanin. “Si çdo shqiptar, edhe ata të diasporës, jam i lumtur për SPAK dhe Gjykatën e Posaçme. Dumani, si vrasës me pagesë, shijon jetën jashtë dhe ne mbetemi të baltosur. Ai do Coca Cola, palestër dhe femra. Unë kam humbur 40 kg, jemi në burg kot. Kam 25 vjet besimtar, por prokuroria dhe gjykata mund të ma heqin baltën. Kam frikë se do vdes nga veremi, jo nga burgu,” u shpreh Qoli.
Përveç kësaj, Qoli ka sulmuar Dumanin duke e cilësuar atë si “mongol leshator” dhe ka aluduar se mund të bëhen si ai, duke vrarë 5-6 persona dhe duke marrë 5 milionë euro nga grupet kriminale për të fituar statusin.
Gjykata ka pezulluar afatin e paraburgimit për të gjithë të akuzuarit deri në seancën e ardhshme, që do të zhvillohet më 4 mars.