Një ngjarje tragjike ka ndodhur në Durrës, ku një 24-vjeçar ka humbur jetën pasi dyshohet se ka rënë në kontakt me energjinë elektrike gjatë kryerjes së detyrës si marinar në një anije. Policia e Durrësit ka arrestuar kapitenin dhe inxhinierin e anijes për veprën penale “Shkelja e rregullave të mbrojtjes në punë”.
Sipas njoftimit të policisë, viktima, shtetasi J. A. nga Azerbajxhani, humbi jetën më 7 dhjetor 2025, gjatë një incidenti në të cilin dyshohet se ka pësuar një goditje nga rryma elektrike. Pas hetimeve dhe veprimeve procedurale, autoritetet arrestuan kapitenin A. Z., shtetas nga Azerbajxhani, dhe inxhinierin D. L., shtetas nga Gjeorgjia, për shpërdorim të rregullave të sigurisë në punë.
Ngjarja ka tronditur komunitetin e punonjësve të anijeve dhe ka ngritur shqetësime për kushte të mundshme të pasigurta pune në industrinë detare. Policia dhe Prokuroria po vijojnë hetimet për të zbardhur plotësisht rrethanat e kësaj tragjedie.