Një 53-vjeçar është arrestuar nga Policia pasi dyshohet se ka qëlluar me pistoletë në ajër, përballë një lokali në fshatin Mullet, me qëllim kanosjen e një 23-vjeçari me të cilin ishte konfliktuar më herët.
Arrestimi i tij u bë në kuadër të operacionit “Njoftimi” dhe sipas policisë, veprimi ka ardhur pas një konflikti të mëparshëm mes dy personave, për motive të dobëta, ndërsa të shtënat dyshohet se janë kryer me qëllim kanosjen e 23-vjeçarit. Arma e zjarrit dhe municioni janë sekuestruar në cilësinë e provës materiale, ndërkohë ndërhyrja e menjëhershme e Policisë bëri të mundur parandalimin e përshkallëzimit të konfliktit.
Njoftimi i policisë:
Tiranë/Finalizohet nga Komisariati Nr. 1, operacioni i koduar “Njoftimi”. Qëlloi me pistoletë në ajër, përballë lokalit në Mullet, ku ndodhej 23-vjeçari me të cilin ishte konfliktuar më parë, arrestohet në flagrancë 53-vjeçari. Sekuestrohet arma e zjarrit bashkë me municionin.
Shërbimet e Komisariatit të Policisë Nr. 1, menjëherë pas njoftimit se në afërsi të një lokali në fshatin Mullet, një shtetas kishte qëlluar në ajër, me armë zjarri, dyshohej për shkak të një konflikti për motive të dobëta, ndërmjet tij dhe një shtetasi që ndodhej në lokal, organizuan punën dhe shkuan në vendngjarje për të sqaruar rrethanat dhe autorësinë e rastit.
Si rezultat i veprimeve të shpejta operacionale, të kryera në kuadër të operacionit të koduar “Njoftimi”, u parandalua përshkallëzimi i këtij konflikti, si dhe u kap në flagrancë dhe u vu në pranga shtetasi F. Ç., 53 vjeç, banues në këtë fshat.
53-vjeçari dyshohet se ka qëlluar në ajër, me armë zjarri (pistoletë), të cilët e posedonte pa leje, përballë lokalit ku ndodhej shtetasi A. H., 23 vjeç, me qëllim kanosjen e tij, sepse ishin konfliktuar më parë, për motive të dobëta.
Materialet procedurale iu referuan Prokurorisë, për veprime të mëtejshme.